Tin tức
របរចិញ្ចឹមមាន់ ក្លាយជាក្តីសង្ឃឹមរបស់កសិករនៅតំបន់ឆ្នេរ ក្នុងការបង្កើនសេដ្ឋកិច្ចគ្រួសារ
រយៈពេលជិត២ឆ្នាំហើយដែល អង្គការ អេដ អេ អាកស្យុង តាមរយៈអង្គការហេហ្វឺ បានផ្តល់ដើមទុន សម្ភារៈ និងបណ្តុះបណ្តាលអំពីបច្ចេកទេសចិញ្ចឹមមាន់ឱ្យបានត្រឹមត្រូវ និងបានផលល្អប្រសើរ ដល់កសិករនៅតំបន់ឆ្នេរសមុទ្រ។ កសិករប្រមាណ ៤០គ្រួសារ ដែលទទួលបានការបណ្តុះបណ្តាលនេះ កំពុងតែរីករាយនឹងលទ្ធផលដ៏ប្រសើរពីការចិញ្ចឹមមាន់ ដែលបានផ្លាស់ប្តូរជីវភាពគ្រួសារពួកគេឱ្យធូរធារជាងមុន។
កាលពីប្រមាណកន្លះឆ្នាំមុន លោក ញ៉ែត សុភ័ក្រ្ត គឺជាកម្មករសំណង់ ដែលរកប្រាក់ចំណូលបន្ថែម ដើម្បីផ្គត់ផ្គង់ជីវភាពគ្រួសារ។ ប៉ុន្តែពេលនេះ លោក គឺជាអ្នកជំនាញចិញ្ចឹមមាន់យកសាច់ម្នាក់ នៅសង្កាត់អូរក្រសារ ក្នុងក្រុងកែប ខេត្តកែប។ លោក បានឈប់ធ្វើជាកម្មករសំណង់ និងងាកមកចិញ្ចឹមមាន់ បន្ទាប់ពីទទួលបានការបណ្តុះបណ្តាលបច្ចេកទេសចិញ្ចឹម ពីអង្គការ ហេហ្វឺ។ បច្ចេកទេសទាំងនោះ មានដូចជាការរៀបចំទ្រុង ជ្រើសរើស និងបង្កាត់ពូជ, ការផ្សំចំណី, ការថែទាំ និងការផ្តល់វ៉ាក់សាំងការពារជំងឺជាដើម។
ផ្តើមដំបូងពីការចិញ្ចឹមមាន់សាច់ ៥០ក្បាល សព្វថ្ងៃនេះ លោក សុភ័ក្រ្ត បានពង្រីកការជាបន្តបន្ទាប់ រហូតដល់មានមាន់ពូជប្រមាណ៥០ក្បាល និងមាន់សាច់ជាង១៥០ក្បាល។ បុរសវ័យ៣៩ឆ្នាំរូបនេះ ពិតជារីករាយ ដែលខ្លួនមានឱកាសទទួលបានជំនាញថ្មីសម្រាប់ជីវិត និងជាជំនាញដែលបានធ្វើឱ្យលោក និងគ្រួសារ លែងខ្វះមុខ ខ្វះក្រោយដូចមុន។ ការចិញ្ចឹមមាន់ទទួលបានទិន្នផលល្អ និងបានកែប្រែជីវភាពគ្រួសាររបស់កសិករនៅតំបន់ឆ្នេររូបនេះ ឱ្យប្រសើរពីមួយថ្ងៃទៅមួយថ្ងៃ ពោលគឺលោក ញ៉ែត សុភ័ក្រ អាចចាត់ចែងការចំណាយសប់គ្រប់នៅក្នុងផ្ទះនិងផ្គង់កូនឱ្យរៀនសូត្រដោយមិនលំបាក។
«ពីមុនលំបាកណាស់ ប៉ុន្តែឥឡូវលក់(មាន់)តែ១ ឬ២ អាចឱ្យកូនទៅរៀនបានដែរ។ របរចិញ្ចឹមមាន់ ធ្វើឱ្យជីវភាពគ្រួសារប្រសើរជាងមុន អាចឱ្យកូនៗរៀនសូត្រគ្រប់គ្រាន់។»។
លោក ញ៉ែត សុភ័ក្រ ក៏គ្រោងពង្រីកការចិញ្ចឹមមាន់របស់ខ្លួន ឱ្យកាន់តែធំជាងបច្ចុប្បន្នដែរ។ ទន្ទឹមនឹងនេះ កសិកររូបនេះ ក៏រីករាយក្នុងការចែករំលែកបច្ចេកទេសចិញ្ចឹមមាន់នេះ ទៅដល់កសិករដទៃទៀត ដែរ ដើម្បីយកទៅធ្វើរបររកប្រាក់ចំណូលបន្ថែមសម្រាប់គ្រួសារ។ «ខ្ញុំប្ដេជ្ញាថា នឹងខិតខំពង្រីកអាជីវកម្មចិញ្ចឹមមាន់នេះ ឱ្យបានធំទូលំទូលាយ ដើម្បីឱ្យកូនបានរៀនសូត្រ»។
លោក ខៀន ជៀន ជាកសិករម្នាក់ទៀត ដែលទទួលបានបច្ចេកទេសចិញ្ចឹមមាន់ស្រែ និងភ្ញាស់កូនមាន់ ពីអង្គការអង្គការហេហ្វឺដែរ។ មានទីលំនៅក្នុងភូមិកោះក្រស្នា ឃុំឫស្សីស្រុកខាងលិច ស្រុកកំពង់ត្រាច ខេត្តកំពត លោក ខៀន ជៀន ថាការបណ្តុះបណ្តាលបច្ចេកទេសចិញ្ចឹមសត្វនេះ គឺពិតជាសារៈសំខាន់ខ្លាំងណាស់សម្រាប់ប្រជាកសិករ ដែលកំពុងត្រូវការចំណេះដឹងថ្មី ដើម្បីបង្កើតមុខរបរដែលផ្តល់ប្រាក់ចំណូលបន្ថែមគ្រួសារ ក្រៅពីការងារធ្វើស្រែ ចម្ការ និងនេសាទ។
