Tin tức
កសិករគំរូក្នុងស្រុកទឹកផុស ចិញ្ចឹមមាន់ស្រែលក់ រកចំណូលបានរាប់ពាន់ដុល្លារ និងមិនបាច់ចំណាកស្រុក
កំពង់ឆ្នាំង៖ កសិករគំរូឈ្មោះ សយ ចាន់ណា រស់នៅក្នុងឃុំជៀប ស្រុកទឹកផុស ខេត្តកំពង់ឆ្នាំង បានចិញ្ចឹមមាន់ស្រែនៅផ្ទះរបស់ខ្លួន រហូតដល់ជាង ២៥០០ក្បាល និងទទួលផលក្នុង១ខែៗ ចាប់ពី២៥០០ដុល្លារ ដល់៣០០០ដុលា្លរ។ ការងារនេះ បានធ្វើអោយរូបគាត់មិនបាច់ចំណាកស្រុក រស់នៅក្បែរប្រពន្ធកូន ហើយការចិញ្ចឹមមាន់នេះគឺទាមទារអោយកសិករប្រឹងប្រែងអត់ធ្មត់ និងទទួលយកបច្ចេកទេសចិញ្ចឹមពីមន្ទីរកសិកម្មខេត្ត។
កសិករ សយ ចាន់ណា បានបន្ថែមថា កាលពីជិត១០ឆ្នាំមុន ដោយមានការបង្ហាត់បង្ហាញនូវរបៀបចិញ្ចឹម ការមើលថែ ក៏ដូចជាបច្ចេកទេសផ្សេងៗទៀតពីមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង គាត់បានចាប់ផ្តើមចិញ្ចឹមមេមាន់ស្រែចំនួន១៥ក្បាល និងឈ្មោលចំនួន ៤ក្បាល។ ដោយសារការអនុវត្តតាមបច្ចេកទេសចិញ្ចឹមរបស់មន្ទីរកសិកម្ម រូបគាត់បានពង្រីកការចិញ្ចឹមជាបន្តបន្ទាប់ រហូតបានធ្វើជាកសិដ្ឋានមួយក្រោយផ្ទះមានទំហំប្រមាណ ១០ម៉ែត្រគុណនឹង២០ម៉ែត្រ។ រហូតមកដល់សព្វថ្ងៃនេះ កសិករ សយ ចាន់ណា បានចិញ្ចឹមមាន់ស្រែបានរហូតដល់ជាង២ពាន់ក្បាល ។
ចំពោះការលក់ចេញវិញ លោកបានកុងត្រាជាមួយផ្សារទំនើបមួយនៅទីក្រុងភ្នំពេញ ដោយអាចលក់ជូនផ្សារទំនើបនោះក្នុង១ខែប្រមាណជាង១០០ក្បាលចំពោះមាន់សាច់ ពងមាន់បាន២ពាន់គ្រាប់ ។ ក្រៅពីនេះ លោកបានយកពងមាន់ទៅភ្ញាស់យកកូនផងដែរ ដែលក្នុង១ខែៗ លោកអាចលក់កូនមាន់ទៅអតិថិជនក្នុងសហគមន៍ ក៏ដូចជាអ្នកចិញ្ចឹមដទៃក្រៅពីសហគមន៍ចាប់ពី២ពាន់ទៅ២៥០០ក្បាល។ ការងារនេះ បានធ្វើអោយលោករកចំណូលបានចាប់ពី២៥០០ដុល្លារ ដល់៣០០០ដុល្លារ ដែលក្រៅពីការផាត់ទូទាត់ការចំណាយទៅ លោកអាចសល់ប្រាក់ចំណេញចាប់ពី១៥០០ដុល្លារ។
កសិករ សយ ចាន់ណា មិនត្រឹមតែចិញ្ចឹមមាន់ស្រែលក់នោះទេ គាត់នៅដាំដំណាំបន្លែបង្ការផ្សេងៗ និងចិញ្ចឹមត្រី កង្កែប លក់អោយប្រជាពលរដ្ឋក្នុងសហគមន៍ទៀតផង ហើយការងារកសិកម្មក្នុងគ្រួសារបែបនេះ បានធ្វើអោយជីវភាពគ្រួសារលោកធូរធារ មិនបានខ្ចីបុលពីធនាគារ ឬមីក្រូហិរញ្ញវត្ថុណាឡើយ។ លោកបានពេញចិត្តនឹងការងារនេះណាស់ លោកក៏មានមហិច្ឆតាពង្រីកការចិញ្ចឹមរបស់លោកបន្ថែមទៅទៀត ហើយបើប្រជាកសិករណាចង់ចេះចិញ្ចឹមមាន់ស្រែនេះ លោកនឹងអាចបង្រៀនដោយមិនគិតប្រាក់ឡើយ តែសូមអោយការចិញ្ចឹមនោះ ត្រូវតែចេះអត់ធ្មត់ និងព្យាយាម៕ អត្ថបទ៖ កាំង ហុងវាស្នា
