Tin tức
មាន់រាប់ពាន់ក្បាល ត្រូវបានកសិករចិញ្ចឹមនៅក្នុកសិដ្ឋានចិញ្ចឹមមាន់មួយកន្លែងស្ថិតនៅក្នុងខេត្តកំពង់ស្ពឺ
ប្រជាកសិករចិញ្ចឹមមាន់នៅខេត្តកំពត រអ៊ូរទាំពីការចុះថ្លៃ និងមិនមានឈ្មួញចុះមកទិញមាន់ពួកគាត់ដូចឆ្នាំមុនៗ ។ ក៏ប៉ុន្តែទំនិញគ្រប់ប្រភេទ បែរជាហក់ឡើងថ្លៃយ៉ាងគំហុក ជាពិសេសថ្លៃចំណីសត្វ និងប្រេងសាំង។ កសិករស្នើដល់រដ្ឋាភិបាលឲ្យជួយបញ្ចុះតម្លៃទំនិញផ្សេងៗ និងប្រេងសាំងឲ្យចុះមកនៅត្រឹមតម្លៃបង្គួរវិញ។
ប្រជាកសិករចិញ្ចឹមមាន់នៅស្រុកបន្ទាយមាស ខេត្តកំពត បារម្ភពីការធ្លាក់ចុះនូវតម្លៃមាន់ចិញ្ចឹមយកសាច់ តែតម្លៃជី ចំណីសត្វ ភ្លើង និងប្រេងឥន្ធនៈ បែរជាឡើងថ្លៃឥតឈប់។ ការឡើងថ្លៃមុខទំនិញសព្វសារពើកសិករមិនសូវបារម្ភទេ ពួកគាត់ភ័យខ្លាំងបំផុតគឺ ការដែលចិញ្ចឹមមាន់បានហើយពុំមានឈ្មួញ ឬក៏ទីផ្សារសម្រាប់លក់ នាំចេញនូវសត្វមាន់ចិញ្ចឹមរបស់ពួកគាត់។
វិទ្យុអាស៊ីសេរី មិនអាចទាក់ទងសុំការបំភ្លឺជុំវិញបញ្ហានេះ ពីប្រធានការិយាល័យផលិតកម្ម និងបសុព្យាបាលខេត្តកំពត លោក ម៉េង សន្តិភាព និងប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត លោក ចាន់ រិទ្ធិ បានទេ នៅល្ងាចថ្ងៃទី២ កក្កដា ដោយទូរស័ព្ទហៅចូលពុំមានអ្នកទទួល។ការធ្លាក់ចុះថ្លៃមាន់ខុសប្រក្រតី គឺចាប់តាំងពីផ្ទុះជំងឺកូវីដ១៩ ក្នុងព្រឹត្តិការណ៍សហគមន៍២០ កុម្ភៈ មក។ កាលពីដើម មាន់ចិញ្ចឹមយកសាច់ដែលធ្លាប់តែមិនខ្វះទីផ្សារសោះ និងមានតម្លៃខ្ពស់ខ្ទង់បួនពាន់ (៤.០០០) ទៅប្រាំពាន់ (៥,០០០) រៀលក្នុងមួយគីឡូក្រាម បែរជាធ្លាក់ថ្លៃជាងពាក់កណ្ដាលរហូតដល់គ្មានអ្នកទិញ។
ប្រជាកសិករទទូចដល់រដ្ឋាភិបាល និងមន្ត្រីជំនាញផ្នែកទីផ្សារឲ្យជួយ រកឈ្មួញ ក៏ដូចជាទីផ្សារសម្រាប់នាំចេញនូវមាន់ចិញ្ចឹម ដែលកសិករខិតខំចិញ្ចឹមបានផលច្រើនហើយ បែរជាកកកុញរកទីផ្សារនាំចេញគ្មាន។ បើមន្ត្រីកសិកម្មមិនជួយប្រជាកសិករទេ នោះកសិករនឹងជួបផលលំបាកក្នុងជីវភាពប្រចាំថ្ងៃជាក់ជាមិនខាន ហើយនឹងរកច្រកចេញពុំបានឡើយ៕
