Tin tức
ជំងឺផ្ដាសាយបក្សីអាចឆ្លងពីមនុស្សម្នាក់ទៅម្នាក់ទៀតដែរទេ?
ជំងឺផ្ដាសាយបក្សីអាចឆ្លងពីមនុស្សម្នាក់ទៅម្នាក់ទៀតដែរទេ?
កាលពីកន្លងទៅ នាយកដ្ឋានប្រយុទ្ធប្រឆាំងជំងឺឆ្លង CDC កម្ពុជា បានប្រកាសពីករណីស្លាប់កុមារី អាយុ១១ឆ្នាំម្នាក់ ដោយសារមេរោគផ្ដាសាយបក្សីH5N1។ កុមារីរូបនេះមានទីលំនៅក្នុង ភូមិ រលាំង ឃុំ រំលេច ស្រុកស៊ីធរកណ្តាល ខេត្តព្រៃវែង និងបានធ្លាក់ខ្លួនឈឺកាលពីថ្ងៃទី១៦ខែកុម្ភៈ និងបានស្លាប់នៅថ្ងៃទី២២។ លទ្ធផលតេស្តសំណាករបស់កុមារីដោយវិទ្យាស្ថានជាតិសុខភាពសាធារណៈបង្ហាញថានាងវិជ្ជមានមេរោគផ្ដាសាយបក្សីH5N1។
តើមេរោគផ្ដាសាយបក្សីឆ្លងមកមនុស្សដោយរបៀបណា?
បើតាម CDC អាមេរិកវីរុសនេះអាចឆ្លងទៅមនុស្សបានតាមរយៈការប៉ះពាល់សត្វដែលមានជាប់វីរុស និងក៏អាចពីបរិយាកាសដែលមានវីរុសនេះផងដែរ។ វីរុសអាចចូលទៅក្នុងខ្លួនមនុស្សតាមរយៈភ្នែក ច្រមុះ ឬមាត់ ពេលដកដង្ហើមចូល។ ពេលយើងប៉ះពាល់បក្សី រស់ ឬងាប់មានវីរុសនេះ ហើយយើងយកដៃមកប៉ះភ្នែក មាត់ ឬច្រមុះ នោះវីរុសនឹងឆ្លងមកយើងបាន។
រោគសញ្ញានៃការឆ្លងជំងឺនេះមានដូចជាក្ដៅខ្លួនលើសពី៣៨អង្សា ឈឺក ឈឺសាច់ដុំ និងក្អក។
ឥណ្ឌានឹងសម្លាប់សត្វបក្សីរាប់ម៉ឺនក្បាលដោយសារការផ្ទុះឡើងនៃជំងឺផ្តាសាយបក្សី
រុមមន្ត្រីឥណ្ឌាបាននិយាយកាលពីថ្ងៃអង្គារថា បសុបក្សីរាប់ម៉ឺនក្បាលនឹងត្រូវបានសម្លាប់បន្ទាប់ពីមានសត្វស្លាបជាច្រើនប្រភេទបានងាប់នៅទូទាំងប្រទេសឥណ្ឌាដោយសារការផ្ទុះឡើងនៃជំងឺផ្តាសាយបក្សី។
រដ្ឋយ៉ាងហោចចំនួន៦បានបង្កើនកិច្ចខិតខំប្រឹងប្រែងដើម្បីទប់ស្កាត់ការផ្ទុះឡើងនៃជំងឺផ្តាសាយបក្សីពីរប្រភេទគឺ H5N1 និង H5N8 ក្នុងរយៈពេលប៉ុន្មានថ្ងៃថ្មីៗនេះបន្ទាប់ពីប្រភេទបក្សីបម្លាស់ទី, សត្វមាន់, ទា និងក្អែករាប់ពាន់ក្បាលបានងាប់។
មេរោគផ្តាសាយបក្សីប្រភេទ H5N8 ដែលកើតមានក្នុងចំណោមបសុបក្សីនិងបក្សីព្រៃនោះបានឆ្លងរាលដាលនៅទូទាំងប្រទេសជាច្រើនចាប់តាំងពីដើមឆ្នាំមុន។
មន្ត្រីនៅក្នុងរដ្ឋ ហ៊ីម៉ាចាល់ ប្រាដេស (Himachal Pradesh) បាននិយាយថា កាលពីសប្តាហ៍មុនគេបានប្រទះឃើញសាកសពសត្វរាប់រយក្បាលនៅមាត់បឹងមួយកន្លែងដែលគេតែងតែឃើញមានហ្វូងបក្សីបម្លាស់ទីនៅក្នុងអំឡុងរដូវរងា។
សំណាកដែលបានបញ្ជូនទៅវិទ្យាស្ថានប្រយុទ្ធប្រឆាំងនឹងជំងឺសត្វត្រូវបានធ្វើតេស្តិ៍វិជ្ជមានជំងឺផ្តាសាយបក្សីប្រភេទ H5N1។
គួរបញ្ជាក់ថា សត្វដែលងាប់នោះភាគច្រើនគឺជាសត្វក្ងានមួយប្រភេទនៅអាស៊ីកណ្តាលដែលស្ថិតក្នុងចំណោមប្រភេទសត្វស្លាបហោះបានខ្ពស់បំផុតនៅលើពិភពលោក ហើយពួកវាបានបម្លាស់ទៅតំបន់អាស៊ីខាងត្បូងក្នុងអំឡុងរដូវរងា៕
